Ֆայլի անվանում և դասավորում

Լավ դասավորված կառուցվածքները և ֆայլի համապատասխան անունները դյուրացնում են ֆայլերին հետևելը և դրանք դասավորելը, ինչպես նաև անհրաժեշտ են  IDEP-ի աշխատանքի ընթացակարգի համար: Ֆայլերն անվանելիս կամ դասավորելիս՝ Դուք պետք է հետեւողական լինեք. այնպես դասավորեք, որպեսզի այդ ֆայլերը դյուրությամբ ճանաչվեն և պատշաճ կերպով դասակարգվեն: Տեղեկատուի հստակ կառուցվածք և ֆայլերի անվանման սկզբունքներ կարգավորեք, որոնք հետևում են այս նմուշին՝ ծրագրի նույնացուցիչ + խմբավորում (օրինակ ամսաթիվ կամ ծավալ) + եզակի նույնացուցիչի որոշ տեսակ (project identifier + grouping (like date or volume) + some type of unique identifier): 

Տվյալների կառուցվածքի ապահովում

Ուշադիր մտածեք, թե ինչպես կարող եք լավագույնս կառուցել Ձեր տվյալները՝ սկսած Ձեր ծրագրի ամենավաղ փուլերից: Փորձեք մակերեսային ստորակարգություն (հիերարխիա) պահել (թղթապանակների ոչ խորը ներդրում): Անհատական գրացուցակները կարող են խմբավորվել մի շարք տարբեր չափորոշիչներով, այդ թվում՝ ամսաթիվ, ձևաչափ, ենթահավաքածու կամ որեւէ այլ կատեգորիա, որը լավագույնս իմաստավորում է Ձեր ծրագիրը:

Տվյալների կառուցվածքների որոշ օրինակներ ներառում են կազմակերպում ըստ՝

• ևաչափի (տեքստ, պատկերներ, ձայնային ֆայլեր և այլն)
• ժանրի (հարցազրույցներ, պոստերներ, լրագրեր, բացիկներ և այլն)
• միավորի (ամսագրի տարի/հատոր, արխիվային արկղ)

Ֆայլի անուններ

Ֆայլի անունները պետք է Ձեզ թույլ տան անուններից ճշգրտությամբ ճանաչել ֆայլերը: Ձեր ֆայլերն անվանելու ձևաչափ ընտրեք և հետեւողականորեն օգտագործեք այն: Անվան մեջ ներառեք այն տվյալները, որոնք Ձեզ թույլ կտան Ձեր ֆայլերը զանազանել մեկը մյուսից՝ հետևելով մի նմուշի, ինչպես՝ ծրագրի նույնացուցիչ + խմբավորում (օրինակ՝ ամսաթիվ կամ հատոր) + միավորի նույնացուցչի որեւէ տեսակ (project identifier + grouping (like date or volume) + some type of item identifier):

Ի նկատի ունեցեք, թե ինչպես են տարրերը ընդհանուրից առանձնահատուկի փոխվում: Մի քանի տարրեր, որոնք պետք է ի նկատի ունենալ, ներառում են՝

• ծրագրի կամ հավաքածուի նույնացուցիչ՝ անուն, հապավում, հավաքածուի համար և այլն,
• խմբավորում՝ տարի, հատոր (ամսագրի), արխիվային սերիա կամ արկղ և այլն,
• միավորի նույնացուցիչ՝ էջ, համար (ամսագրի), շարք, եզակի նույնացուցիչ (ISBN, OCLC, դարակի նշան)

Մի քանի լավագույն գործելակերպեր (պրակտիկա).

• Պետք է խուսափել բոլոր հատուկ գրանշանները, ինչպիսին են՝ ~ ! @ - # $ % ^ & * ( ) ; < > ? , [ ] { } ' " | , օգտագործելուց։ Գերադասեք թվերը, լատինական տառերը (նախընտրելի է փոքրատառ) և ընդգծումները _:
• Բացատներ և գծիկներ մի՛ օգտագործեք: Որոշ ծրագրաշարեր չեն ճանաչի բացատներով ֆայլի անունները, և բացատներով ֆայլերի անունները պետք է ներառվեն չակերտների մեջ, երբ օգտագործվում են հրամանատողում (command line):
• Բացատների այլընտրանքները ներառում են՝
  • ընդգծումները, օրինակ՝ file_name.xxx
  • առանց զատելու՝ filename.xxx
  • «Ուղտային ոճը», որտեղ տեքստի յուրաքանչյուր բաժնի առաջին տառը գրվում է մեծատառով, օրինակ՝ fileName.xxx
• Ամսաթվի նշանակման լավ ձևաչափ է՝ ՏԱՐԻ-ԱՄ-ՕՐ YYYY_MM_DD կամ ՏԱՐԻ-ԱՄ YYYY_MM: Այս ձևաչափը երաշխավորում է, որ Ձեր բոլոր ֆայլերը կմնան ժամանակագրական կարգով, նույնիսկ մի քանի տարիների ընթացքում:
• Ֆայլերի անունները հնարավորինս կարճ պահեք, քանի որ ֆայլերի երկար անունները լավ չեն աշխատում որոշ տեսակի ծրագրաշարերի հետ: Ներառեք միայն այն տվյալները, որոնք անհրաժեշտ են ֆայլը գտնելու և ճանաչելու համար: Ձգտեք իմաստալից և հակիրճ լինել: Հիշե՛ք, որ ֆայլի անունը այն տեղը չէ, որտեղ պետք է արձանագրվեն նկարագրական մետատվյալները:
• Երբ հաջորդական համարակալման համակարգ եք օգտագործում, բավարար քանակով նախորդող զրոներ օգտագործեք՝ հստակեցման եւ երաշխավորելու համար, որ ֆայլերը դասակարգված (սորտավորված) են հաջորդական կարգով: Օրինակ, օգտագործեք 0001, 0002, ...0010, 0011 ... 0100, 0101 և այլն՝ 1, 2, ...10, 11 ... 100, 101 և այլնի փոխարեն:

Այլ հուշումներ

Գրացուցակի մեջ ներառեք README.txt ֆայլ , որը կբացատրի անվանման Ձեր ձևաչափը՝ ցանկացած հապավումների կամ գաղտնագրերի հետ միասին, որոնք Դուք օգտագործել եք: Այս փաստաթղթերն օգտակար կլինեն և՛ ծրագրի կամ փորձի ընթացքում, և՛ ապագայում: